Moie Gilles, du bass elo schon eisen 4. Interviewskandidat. Kanns du dech e bësse virstellen fir déi Leit, déi eis liesen?
Moien, ech sinn de Gilles an ech hunn 12 Joer. Nieft dem Programméieren ass d’Musek mäin zweeten Hobby. Ech sinn am Lycée Aline Mayrisch, wou ech fir de Moment op enger 7e TE sinn.
Wéi bass de dozou komm Musek ze spillen, a firwat grad Trompett?
Ma uséch wollt ech iergendeppes maachen a menger Fräizäit, wou ech nach am drëtte Schouljoer war an deemols war ech nach net esou begeeschtert vun de Computeren wéi elo, well ech och kee gudde Computer hat. Dunn hunn ech ugefaange Sport ze maachen, wat mer awer net esou richteg gefall huet. Iergendwann hunn ech dunn en Ziedel vun der déifferdenger Museksschoul kritt, an du sinn ech einfach emol kucke gaangen. Ee Kolleg vu mer huet mech fir d’Trompett begeeschtert kritt, an doropshinn hunn ech einfach ugefaangen dat Instrument ze spillen.
Wat gefällt dir am Beschten an der Harmonie Prince Guillaume?
Mir gefalen d’Leit, déi do spillen am Beschten, well se all fein a cool sinn.
Wéi hues du de “Concert du Nouvel An” fonnt? Huet dir de Programm, dee mir gespillt hunn, gefall?
De Concert hunn ech einfach super fonnt. Ech fannen och, dass ech net ganz vill Fehler gespillt hunn. Wat mer awer net esou gutt gefall huet, war de Sall, deen ech ze kleng fonnt hunn.
Du hues d’iPhone App vun der Harmonie Municipale Déifferdeng gemaach. Ween huet dir bäibruecht, wéi een dat mécht a wéi laang brauch een iwwerhaapt, fir esou eng App ze maachen?
Ech hu mer selwer bäibruecht, wéi een sou eng App mécht, an ech hunn ee Mount gebraucht fir d’Programméiersprooch Objective – C ze verstoen. Wann ech géing e ganzen Dag un engem Projet schaffen, da wier ech fäerdech, wann et net ze schwéier oder ze grouss ass. Bei der HMD App hunn ech zum Beispill zesumme gerechent ongeféier zwee Deeg gebraucht.
Ass daat déi eenzeg App, déi s du bis elo gemaach hues oder fënnt een der nach méi vun dir um App Store?
Um App Store fënnt een nach 3 aner Apps vu mer, zwou dovunner si Spiller. Nieft der HMD App gëtt et nach eng aner, déi heescht Luxembourg Pro (fir déi wou sech meng Apps ugekuckt hunn, Luxembourg Pro huet eng Kéier Luxembourg geheescht). Am Ganze sinn et also 4 Apps.
A fir ofzeschléissen, kanns du de Leit, déi eis liesen nach eppes mat op de Wee ginn?
Wann der mat iergendeppes ufängt, da fängt et richteg un.
